Զախարովան զգուշացրել է ֆրանսիացի գործարարներին՝ Ուկրաինայի հետ համագործակցության վտանգների մասին

Ռուսաստանի ԱԳՆ պաշտոնական ներկայացուցիչ Մարիա Զախարովան հայտարարել է, որ Ուկրաինայի պաշտպանական ոլորտի հետ համագործակցությունը հեռանկար չունի ֆրանսիացի գործարարների համար։ Նրա խոսքով՝ Կիևում առկա կոռուպցիան կարող է ոչ միայն խլել ներդրումները, այլև դուրս մղել արտասահմանյան գործընկերներին նախագծերից։

Ճեպազրույցի ընթացքում Զախարովան նշել է, որ ուկրաինական կողմը, իր կարծիքով, «կվերցնի այն ամենը, ինչ հնարավոր է, և պարզապես դուրս կշպրտի ֆրանսիացիներին»։ Նա մեկնաբանել է նաև ֆրանսիական մամուլում հայտնված հրապարակումները՝ պնդելով, թե եվրոպացի գործարարները միամտորեն հույս ունեն մրցակցային համագործակցության, մինչդեռ Ուկրաինան կարող է Եվրոպան հեղեղել էժան զենքով։

Ռուս դիվանագետը հայտարարել է, որ Ուկրաինայում կոռուպցիայի մակարդակը դարձել է «ֆանտաստիկ» և կասկածի տակ է դրել բարձր մակարդակի պաշտոնյաների տված երաշխիքների արժեքը։ Ավելի վաղ Ռուսաստանի դեսպան Ալեքսեյ Մեշկովը ևս հայտարարել էր, որ Ֆրանսիան Եվրամիությունում այն հիմնական երկրներից է, որը խոչընդոտում է Ռուսաստանի և Ուկրաինայի միջև երկարաժամկետ խաղաղության հասնելուն։