Գերմանիան ցանկանում է փոխել Եվրամիության կառավարման համակարգը

Գերմանիան ակտիվորեն առաջ է մղում Եվրամիության բարեփոխման գաղափարը՝ փորձելով փոխել միության ներսում որոշումների ընդունման ներկայիս մեխանիզմը։ Այս մասին հայտարարել է քաղաքագետ Ալեքսանդր Ռարը՝ մեկնաբանելով Բեռլինի նախաձեռնությունները։

«Взгляд» պարբերականի փոխանցմամբ՝ ներկայում Եվրամիությունում կարևոր որոշումները ընդունվում են միայն բոլոր անդամ երկրների միաձայն համաձայնությամբ, ինչի պատճառով նույնիսկ մեկ պետություն կարող է արգելափակել ամբողջ միության քաղաքականությունը։ Ռարի խոսքով՝ Գերմանիան ցանկանում է անցնել մեծամասնության քվեարկության համակարգի, ինչը զգալիորեն կփոխի Եվրամիության կառուցվածքը։

Փորձագետը նշել է, որ նման փոփոխությունները կարող են Եվրամիությանը մոտեցնել «գերպետության» կամ «փափուկ կայսրության» ձևաչափին։ Նախաձեռնությանը աջակցում են նաև Ֆրանսիան և մի շարք այլ երկրներ։ Ռարի կարծիքով՝ Բեռլինը փորձում է արագացնել բարեփոխումները, քանի դեռ Եվրահանձնաժողովը ղեկավարում է Ուրսուլա ֆոն դեր Լայենը, և եվրոպական երկրներում իշխանության չեն եկել աջ պոպուլիստական ուժերը։ Ավելի վաղ հաղորդվել էր, որ Գերմանիան և Շվեդիան գլխավորում են այն երկրների խումբը, որոնք կողմ են ԵՄ անդամ պետությունների վետոյի իրավունքի սահմանափակմանը։