Զախարովան քննադատել է Փաշինյանի և Զելենսկու անգլերեն զրույցը

Ռուսաստանի ԱԳՆ պաշտոնական ներկայացուցիչ Մարիա Զախարովան կոշտ է արձագանքել Եվրոպական քաղաքական համայնքի գագաթնաժողովի ընթացքում Հայաստանի վարչապետ Նիկոլ Փաշինյանի և Ուկրաինայի նախագահ Վլադիմիր Զելենսկու անգլերենով անցկացրած զրույցին՝ այն անվանելով «էժան շոու» և «ծաղր ժողովուրդների նկատմամբ»։

Զախարովան նշել է, որ երկու առաջնորդների անգլերեն շփումը վիրավորական է ինչպես Ուկրաինայի, այնպես էլ Հայաստանի ժողովրդի համար։ Նրա խոսքով՝ Ուկրաինայի բնակչության մեծ մասը խոսում է ռուսերեն, իսկ Հայաստանի դեպքում ևս նման ձևաչափը տարօրինակ է թվում։ Ռուս դիվանագետը ընդգծել է, որ նույնիսկ չի ցանկանում կատակել այդ փաստի շուրջ։

Ավելի վաղ հայտնի էր դարձել, որ Փաշինյանն ու Զելենսկին գագաթնաժողովի շրջանակում քննարկել էին տարածաշրջանային անվտանգության հարցեր, խաղաղության հաստատման ուղղությամբ Կիևի դիվանագիտական աշխատանքը և տնտեսական համագործակցությունը։ Զախարովան նաև հիշեցրել է, որ Զելենսկին իր նախընտրական քարոզարշավի ժամանակ խոստանում էր պաշտպանել ռուսաց լեզվի կարգավիճակը Ուկրաինայում։