Օպերային երգիչը դատի է տվել Առաջին ալիքին՝ КВН-ի կատակի պատճառով

Ռուս օպերային երգիչ Սերգեյ Մոսկալկովը դատական հայց է ներկայացրել Ռուսաստանի Առաջին ալիքի դեմ՝ КВН հաղորդման ընթացքում հնչած կատակի պատճառով։ Այդ մասին հայտնել է Մոսկվայի ընդհանուր իրավասության դատարանների պաշտոնական Telegram ալիքը։

Հայցը ներկայացվել է Օստանկինոյի շրջանային դատարան։ Պատճառը դարձել է մայիսի 1-ին «КВН. Բարձրագույն լիգա» ծրագրում Error 404 թիմի կատակը, որտեղ Մոսկվայի «թերություններից» մեկը ներկայացվել էր որպես «շատ ռուսների առկայությունը»։ Մոսկալկովի կարծիքով՝ այդ արտահայտությունը վիրավորական է ռուս ժողովրդի նկատմամբ և նվաստացնում է իր արժանապատվությունը։

Երգիչը պահանջում է դատարանի միջոցով ճանաչել հնչած արտահայտությունը որպես իրականությանը չհամապատասխանող և իր պատիվն ու արժանապատվությունը վնասող հայտարարություն։ Նա նաև պահանջում է Առաջին ալիքից 300 հազար ռուբլի բարոյական վնասի փոխհատուցում։