Չինաստանում նախկին պաշտպանության նախարարներին մահապատժի են դատապարտել

Չինաստանի նախկին պաշտպանության նախարարներ Վեյ Ֆենհեն և Լի Շանֆուն դատապարտվել են մահապատժի՝ երկու տարվա հետաձգմամբ։ Այդ մասին հայտնում է չինական «Սինհուա» պետական գործակալությունը։

Չինաստանի դատարանը նախկին բարձրաստիճան պաշտոնյաներին մեղավոր է ճանաչել կոռուպցիոն հանցագործությունների համար։ Հրապարակված տեղեկությունների համաձայն՝ նրանք ներգրավված են եղել խոշոր ֆինանսական չարաշահումների և պաշտոնեական լիազորությունների չարաշահման գործերում։

Չինաստանում նման դատավճիռը սովորաբար նշանակում է, որ մահապատժի իրականացումը երկու տարով հետաձգվում է, և այդ ընթացքում պատժաչափը կարող է փոխարինվել ցմահ ազատազրկմամբ՝ կախված մեղադրյալի վարքից և գործի հետագա գնահատականներից։