Ռուսաստանում կրկին հետաձգել են SJ-100 ինքնաթիռների մատակարարումը

Ռուսական SJ-100 մարդատար ինքնաթիռների սերիական արտադրությունը չի սկսվի 2026 թվականին, ինչպես նախատեսվում էր ավելի վաղ։ «Ростех»-ի ղեկավար Սերգեյ Չեմեզովը Վլադիմիր Պուտինի հետ հանդիպման ժամանակ հայտնել է, որ մատակարարումները տեղափոխվում են 2027 թվական։ Այդ մասին փոխանցում է РИА Новости-ն։

SJ-100-ը համարվում է SSJ-100 ինքնաթիռի ներմուծումից անկախացված տարբերակը։ Այն արտադրում է «Յակովլև» ընկերությունը, որը մտնում է Միավորված ավիաշինական կորպորացիայի կազմի մեջ։ Ներկայում շարունակվում է ինչպես ինքնաթիռի, այնպես էլ ռուսական ՊԴ-8 շարժիչի սերտիֆիկացումը, որը պետք է փոխարինի նախկին ֆրանս-ռուսական SaM146 շարժիչին։ Չեմեզովի խոսքով՝ սերտիֆիկացիոն թռիչքների մոտ 80 տոկոսն արդեն ավարտված է։

Ռուսաստանը SJ-100 ծրագրի վրա մեծ հույսեր էր դրել արևմտյան ավիաշինական ընկերությունների հետ համագործակցության դադարից հետո։ Սկզբնական ծրագրով առաջին մատակարարումները պետք է սկսվեին դեռ 2023 թվականին, սակայն ժամկետները մի քանի անգամ հետաձգվել են։ Միևնույն ժամանակ փորձագետները կասկածում են, որ բոլոր անհրաժեշտ փորձարկումներն ու տեխնիկական ընթացակարգերը հնարավոր կլինի ավարտել նույնիսկ նոր ժամկետներում։