Իրանի պատերազմի ֆոնին Գերմանիայի բյուջեում առաջացել է միլիարդավոր եվրոների պակասուրդ

ԱՄՆ-ի և Իրանի միջև պատերազմի հետևանքով առաջացած էներգետիկ և տնտեսական ճգնաժամը լուրջ հարված է հասցրել Գերմանիայի տնտեսությանը։ Bloomberg-ի տվյալներով՝ մինչև 2030 թվականը Գերմանիայի բյուջեն կարող է կորցնել ավելի քան 50 միլիարդ եվրոյի հարկային մուտքեր։

Գերմանիայի ֆինանսների նախարարության գնահատմամբ՝ 2026 թվականին երկրի բյուջետային եկամուտները կկազմեն մոտ 382 միլիարդ եվրո, ինչը գրեթե 10 միլիարդով պակաս է նախկին կանխատեսումներից։ Ընդհանուր առմամբ առաջիկա չորս տարիներին կորուստները կարող են հասնել 52,3 միլիարդ եվրոյի։

Գերմանիայի ֆինանսների նախարար Լարս Կլինգբայլը հայտարարել է, որ Իրանի շուրջ պատերազմն ու դրա հետևանքով էներգակիրների գների աճը դանդաղեցնում են երկրի տնտեսական վերականգնումը։ Bloomberg-ը նշում է, որ ստեղծված իրավիճակը մեծացնում է ճնշումը կանցլեր Ֆրիդրիխ Մերցի կառավարության վրա, որը ստիպված կլինի միաժամանակ խթանել տնտեսությունը, իրականացնել սոցիալական բարեփոխումներ և կրճատել բյուջետային դեֆիցիտը։