Հայաստան-ԵՄ մշակութային համագործակցության նոր փուլ․ քննարկվում են Հայաստանի ստեղծարար ոլորտի առաջնային ուղղությունները

 

Այն հնարավորություն է ընձեռում քաղաքական հանձնառությունները վերածելու կոնկրետ մշակութային գործողությունների՝ ցույց տալով, թե ինչպես կարող են ստեղծարարությունը, ժառանգությունն ու նորարարությունը նպաստել հասարակական կայունության ամրապնդմանը և նոր տնտեսական հնարավորությունների ստեղծմանը՝ միաժամանակ խթանելով մարդկանց միջև կապերը։

 

Միջոցառումը կազմակերպել էին Հայաստանում ԵՄ պատվիրակությունը և ԿԳՄՍ նախարարությունը՝ EUNIC Armenia մշակութային կլաստերի հետ համագործակցությամբ։ Ներկա են եղել ԿԳՄՍ նախարար Ժաննա Անդրեասյանը, Հայաստանում ԵՄ պատվիրակության ղեկավար, դեսպան Վասիլիս Մարագոսը, նախարարի տեղակալ Արթուր Մարտիրոսյանը, արվեստագետներ, քաղաքականություն մշակողներ, միջազգային գործընկերներ։

 

Ժաննա Անդրեասյանը շնորհակալություն է հայտնել ԵՄ պատվիրակությանը մշակույթի ոլորտում արդյունավետ համագործակցության համար։ Նրա խոսքով՝ այս հարթակը կարևոր հնարավորություն է ոչ միայն երկկողմ համագործակցության տեսանելիությունն ապահովելու, այլև նոր գաղափարներ և թիրախներ ձևավորելու համար։ Նախարարը նշել է, որ վերջին իրադարձությունները Հայաստան-ԵՄ հարաբերություններում նոր հնարավորություններ են բացում, և հատկապես մշակույթի ոլորտը պետք է այդ գործընթացներին արձագանքի ստեղծարար ու նորարար մոտեցումներով։