Սթարմերի Լեյբորիստական կուսակցությունը ծանր պարտություններ է կրել տեղական ընտրություններում

Մեծ Բրիտանիայի վարչապետ Քիր Սթարմերը հայտարարել է, որ շարունակելու է պայքարը և չի հրաժարվելու «փոփոխություններ բերելու» իր խոստումից՝ չնայած տեղական ընտրություններում Լեյբորիստական կուսակցության կրած ծանր կորուստներին։ Reuters-ի փոխանցմամբ՝ ընտրությունների նախնական արդյունքները լուրջ հարված են հասցրել Սթարմերի հեղինակությանը՝ հատկապես Անգլիայի հյուսիսային և կենտրոնական նախկին արդյունաբերական շրջաններում, որոնք երկար տարիներ համարվում էին լեյբորիստների հենակետերը։

Ընտրությունների գլխավոր հաղթողներից մեկը դարձել է Նայջել Ֆարաջի ղեկավարած Reform UK կուսակցությունը, որը ստացել է ավելի քան 350 մունիցիպալ մանդատ։ Վերլուծաբանների գնահատմամբ՝ Բրիտանիայում ավանդական երկկուսակցական համակարգը աստիճանաբար քայքայվում է՝ տեղը զիջելով բազմակուսակցական քաղաքական համակարգին։ Լեյբորիստներն ու պահպանողականները ձայներ են կորցրել ոչ միայն Reform UK-ի, այլ նաև «Կանաչների» և Շոտլանդիայի ու Ուելսի ազգայնական կուսակցությունների օգտին։

Չնայած անհաջող արդյունքներին՝ Սթարմերը հայտարարել է, որ չի պատրաստվում հեռանալ քաղաքականությունից։ Նրա խոսքով՝ ընտրողները դժգոհ են ոչ այնքան ղեկավարությունից, որքան փոփոխությունների դանդաղ տեմպերից։ Սակայն բրիտանական քաղաքական շրջանակներում արդեն սկսել են խոսել հնարավոր ճնշումների մասին, եթե Լեյբորիստական կուսակցությունը շարունակի կորցնել դիրքերը Շոտլանդիայում, Ուելսում և Անգլիայի տեղական խորհուրդներում։ Reuters-ը նշում է, որ Սթարմերի կառավարությունը վերջին շրջանում բախվել է քաղաքական շրջադարձերի, սկանդալների և տնտեսական ճգնաժամի հետևանքով աճող դժգոհության։