Հռոմի պապ Լեոն համաշխարհային առաջնորդներին կոչ է արել նվազեցնել լարվածությունն ու ատելությունը

Հռոմի պապ Լեոն իր պաշտոնավարման առաջին տարեդարձի կապակցությամբ հանդես է եկել խաղաղության կոչով՝ խնդրելով Աստծուն ներշնչել համաշխարհային առաջնորդներին՝ նվազեցնելու միջազգային լարվածությունն ու ատելությունը։ Reuters-ի փոխանցմամբ՝ հայտարարությունը հնչել է Իտալիայի Պոմպեյ քաղաքում անցկացված պատարագի ժամանակ՝ ԱՄՆ պետքարտուղար Մարկո Ռուբիոյի հետ Վատիկանում կայացած հանդիպումից մեկ օր անց։

Պապը հավատացյալներին կոչ է արել աղոթել, որպեսզի աշխարհի ղեկավարները հրաժարվեն բռնությունից և պատերազմական քաղաքականությունից։ Նրա խոսքով՝ անհրաժեշտ է «հպվել մարդկանց սրտերին, հանդարտեցնել թշնամանքն ու եղբայրասպան ատելությունը, ինչպես նաև լուսավորել այն մարդկանց, ովքեր պատասխանատու են պետությունների կառավարման համար»։ Լեոն նաև հայտարարել է, որ համաշխարհային խաղաղությունը վտանգված է ոչ միայն միջազգային հակամարտությունների, այլև այնպիսի տնտեսության պատճառով, որը «զենքի առևտուրը վեր է դասում մարդկային կյանքից»։

Reuters-ը նշում է, որ Վատիկանի և Վաշինգտոնի հարաբերություններում վերջին շրջանում լարվածություն է նկատվում, հատկապես այն բանից հետո, երբ Հռոմի պապը քննադատել էր Իրանի շուրջ պատերազմի թեման։ Չնայած դրան՝ Վատիկանը և ԱՄՆ պետքարտուղար Մարկո Ռուբիոն հայտարարել են երկկողմ հարաբերությունները բարելավելու մտադրության մասին։ Հիշեցնենք, որ Լեոն՝ նախկին կարդինալ Ռոբերտ Պրևոստը, Հռոմի պապ է ընտրվել 2025 թվականի մայիսի 8-ին՝ փոխարինելով հանգուցյալ Ֆրանցիսկոս պապին։