Հարցում․ Թրամփի օրոք ԱՄՆ-ի հեղինակությունը աշխարհում զիջել է Ռուսաստանին

Միջազգային նոր հարցման համաձայն՝ ԱՄՆ-ի նկատմամբ համաշխարհային վերաբերմունքը երկրորդ տարին անընդմեջ վատթարանում է, և երկրի հեղինակության ցուցանիշն արդեն ավելի ցածր է, քան Ռուսաստանինը։ Այս մասին հայտնում է Reuters-ը՝ հղում անելով Democracy Perception Index ամենամյա հետազոտությանը, որը հրապարակվել է Դանիայում գործող Alliance of Democracies Foundation կազմակերպության պատվերով։

Հետազոտության տվյալներով՝ ԱՄՆ-ի ընկալման ցուցանիշը երկու տարվա ընթացքում +22 տոկոսից նվազել է մինչև -16 տոկոս, մինչդեռ Ռուսաստանի ցուցանիշը կազմել է -11 տոկոս, իսկ Չինաստանինը՝ +7 տոկոս։ Հեղինակների գնահատմամբ՝ ԱՄՆ-ի հեղինակության անկման վրա ազդել են Դոնալդ Թրամփի արտաքին քաղաքական քայլերը, ՆԱՏՕ-ի ներսում լարված հարաբերությունները, մաքսատուրքերի քաղաքականությունը, Գրենլանդիայի վերաբերյալ հայտարարությունները, ինչպես նաև Ուկրաինային աջակցության կրճատումն ու Իրանի շուրջ ստեղծված իրավիճակը։

Alliance of Democracies Foundation-ի հիմնադիր և ՆԱՏՕ-ի նախկին գլխավոր քարտուղար Անդերս Ֆոգ Ռասմուսենը հայտարարել է, որ ԱՄՆ-ի հեղինակության «արագ անկումը ցավալի է, բայց անսպասելի չէ»։ Հարցումն իրականացվել է մարտի 19-ից ապրիլի 21-ը՝ Nira Data ընկերության կողմից, և ընդգրկել է ավելի քան 94 հազար մարդու 98 երկրից։ Զեկույցը հրապարակվել է Կոպենհագենում կայանալիք Democracy Summit-ից առաջ։