Փորձագետը կանխատեսել է ԱՄՆ-ի և Իրանի միջև լարվածության սրացում

Արևելագետ Վլադիմիր Սաժինը հայտարարել է, որ ԱՄՆ-ը կարող է ավելի ուժեղ հարվածներ հասցնել Իրանին, եթե Թեհրանը չընդունի Վաշինգտոնի առաջադրած պայմանները։ «Ридус»-ի փոխանցմամբ՝ փորձագետը նշել է, որ ԱՄՆ նախագահ Դոնալդ Թրամփը Իրանի առաջ ներկայացրել է պահանջներ, որոնց համաձայնության դեպքում միայն հնարավոր կլինեն բանակցություններ։

Սաժինի խոսքով՝ Վաշինգտոնը Թեհրանին երկու օր ժամանակ էր տվել որոշում կայացնելու համար, սակայն այդ ժամկետն արդեն ավարտվել է։ Փորձագետը կարծում է, որ ամերիկյան հարվածները նպատակ ունեն ստիպել Իրանին ընդունել ԱՄՆ պայմանները՝ հակառակ դեպքում սպառնալով նոր և ավելի լայնածավալ հարձակումներով։ Նրա գնահատմամբ՝ ներկայում ԱՄՆ-ի և Իրանի միջև հնարավոր բանակցությունների համար «դրական ելքի հիմքեր գրեթե չկան», քանի որ կողմերի դիրքորոշումները լիովին հակասում են միմյանց։

Ավելի վաղ Իրանի զինված ուժերը հրթիռային հարված էին հասցրել ամերիկյան ուժերին, որոնք, ըստ Թեհրանի, հարձակվել էին իրանական տանկերի վրա Օրմուզի նեղուցում։ ԱՄՆ կենտրոնական հրամանատարությունը՝ CENTCOM-ը, հայտարարել էր, որ ամերիկյան ուժերին հաջողվել է որսալ հրթիռներն ու անօդաչու սարքերը։ Միաժամանակ Ռուսաստանի նախագահ Վլադիմիր Պուտինը Իրանի արտգործնախարար Աբբաս Արաղչիի հետ հանդիպման ընթացքում հույս էր հայտնել, որ տարածաշրջանում ճգնաժամը կհաղթահարվի և Մերձավոր Արևելքում խաղաղություն կհաստատվի։