Ռուսաստանի նավթագազային եկամուտները կտրուկ նվազել են

Ռուսաստանի ֆինանսների նախարարությունը հայտնել է, որ 2026 թվականի հունվար-ապրիլ ամիսներին երկրի բյուջեի նավթագազային եկամուտները զգալի անկում են գրանցել։ Պաշտոնական տվյալների համաձայն՝ նախորդ տարվա նույն ժամանակահատվածի համեմատ դրանք նվազել են 38,3 տոկոսով և կազմել 2,298 տրիլիոն ռուբլի։

Գերատեսչության պարզաբանմամբ՝ եկամուտների անկման հիմնական պատճառը նավթի համաշխարհային գների նվազումն է։ Միևնույն ժամանակ ոչ նավթագազային եկամուտները աճել են 10,2 տոկոսով՝ հասնելով 9,423 տրիլիոն ռուբլու։ Ֆինանսների նախարարությունում կանխատեսում են, որ ամբողջ 2026 թվականի ընթացքում նավթագազային եկամուտները կկազմեն 8,919 տրիլիոն ռուբլի, իսկ ոչ նավթագազային եկամուտները՝ 31,365 տրիլիոն։

Ռուսաստանի ֆինանսների նախարարությունը նաև հայտարարել է, որ մայիսից նախատեսում է վերականգնել արտարժույթի և ոսկու առքուվաճառքի գործառնությունները ներքին շուկայում՝ բյուջետային կանոնի շրջանակում։ Ավելի վաղ տնտեսագետ Դմիտրի Պոլևոյը նշել էր, որ ապրիլին նավթագազային եկամուտների ցուցանիշները զգալիորեն վատ են եղել կանխատեսումներից։ Նրա խոսքով՝ լրացուցիչ եկամուտները կազմել են ընդամենը 21 միլիարդ ռուբլի՝ ակնկալվող 200-250 միլիարդի փոխարեն։