Եվրոպայի «Կանաչները» կոչ են արել Մեծ Բրիտանիային վերադառնալ Եվրամիություն

Եվրոպական «Կանաչներ» կուսակցությունը պաշտոնապես կոչ է արել Մեծ Բրիտանիային վերադառնալ Եվրամիության կազմ։ Ինչպես հայտնում է The Guardian-ը, համապատասխան հայտարարությունը հաստատվել է Բրյուսելում կայացած կուսակցության ղեկավարության ամենամյա հանդիպման ընթացքում։

Ընդունված հռչակագրում նշվում է, որ Brexit-ը դարձել է «քաղաքական և տնտեսական ձախողում»՝ երկարաժամկետ բացասական հետևանքներով թե՛ Միացյալ Թագավորության, թե՛ ամբողջ Եվրոպայի համար։ Փաստաթղթում ընդգծվում է, որ «Մեծ Բրիտանիայի ապագան գտնվում է Եվրամիությունում»։

Հայտարարությունից հետո Եվրոպայի տարբեր երկրների «Կանաչ» կուսակցությունները պարտավորվելու են այս դիրքորոշումը հաշվի առնել իրենց քաղաքական հայտարարություններում և քննարկումներում։ The Guardian-ը նշում է, որ սա առաջին դեպքն է, երբ համաեվրոպական քաղաքական ուժը պաշտոնապես հանդես է գալիս Մեծ Բրիտանիայի՝ ԵՄ վերադառնալու օգտին։

Ավելի վաղ Մեծ Բրիտանիայի վարչապետ Քիր Սթարմերը հայտարարել էր, որ չի պատրաստվում հրաժարական տալ՝ չնայած Լեյբորիստական կուսակցության անհաջողություններին տարածաշրջանային ընտրություններում։