Մյանմայում հայտնաբերվել է հսկայական հազվագյուտ ռուբին

Մյանմայում հայտնաբերվել է 2,2 կիլոգրամ քաշ ունեցող հսկայական ռուբին, որի արժեքը կարող է միլիոնավոր դոլարներ կազմել։ Այս մասին հայտնում է Bloomberg-ը՝ հղում անելով երկրի իշխանություններին։

Մյանմայի տեղեկատվության նախարարության տվյալներով՝ խոսքը 11 հազար կարատ քաշ ունեցող մանուշակակարմիր գույնի բացառիկ թանկարժեք քարի մասին է։ Գերատեսչությունում այն բնութագրել են որպես «չափազանց խոշոր, հազվագյուտ և դժվար հասանելի» ռուբին, սակայն չեն հայտնել, թե կոնկրետ ով է այն հայտնաբերել։

Bloomberg-ը հիշեցնում է, որ 1996 թվականին Մյանմայում հայտնաբերվել էր ավելի մեծ՝ 21,4 հազար կարատանոց ռուբին, սակայն նոր գտածոն համարվում է ավելի արժեքավոր՝ իր գույնի և որակի շնորհիվ։ Հրատարակությունը նաև նշում է, որ 2015 թվականին Մյանմայից ստացված 25,59 կարատանոց ռուբինը Sotheby’s աճուրդում վաճառվել էր ավելի քան 30 միլիոն դոլարով։