Հռոմի պապ Լևոն XIV-ի վարկանիշը ԱՄՆ-ում գերազանցել է Թրամփին

ԱՄՆ քաղաքացիների շրջանում Հռոմի պապ Լևոն XIV-ի հանդեպ հավանությունը ավելի բարձր է, քան ԱՄՆ նախագահ Դոնալդ Թրամփի նկատմամբ։ Այս մասին վկայում են The Economist-ի և YouGov-ի համատեղ հարցման արդյունքները։

Հարցման համաձայն՝ ամերիկացիների 55 տոկոսը դրական է գնահատում պոնտիֆիկոսի գործունեությունը, մինչդեռ բացասական կարծիք ունի 24 տոկոսը։ Դոնալդ Թրամփի դեպքում դրական գնահատական է տվել հարցվածների 40 տոկոսը, իսկ բացասական՝ 56 տոկոսը։

Ամենաբարձր աջակցությունը Հռոմի պապը ստացել է աֆրոամերիկացիների և լատինաամերիկացիների շրջանում․ այդ խմբերում նրան դրական է գնահատել համապատասխանաբար 60 և 62 տոկոսը։ Նույն խմբերում Թրամփի նկատմամբ դրական վերաբերմունք հայտնել է միայն 15 և 37 տոկոսը։ Բարձր տարբերություն է արձանագրվել նաև տարեց ամերիկացիների շրջանում։ 45-64 տարեկանների խմբում պոնտիֆիկոսին աջակցել է 63 տոկոսը՝ Թրամփի 43 տոկոսի դիմաց, իսկ 65-ից բարձր տարիքում՝ 58 տոկոսը՝ նախագահի 47 տոկոսի դիմաց։

Ավելի վաղ Թրամփը «կեղծիք» և «անհեթեթություն» էր անվանել այն հարցումները, որոնք ցույց էին տալիս ամերիկացիների դժգոհությունը Իրանի դեմ պատերազմի կապակցությամբ։