Եվրոպայում զգուշացրել են ավիավառելիքի հնարավոր պակասի մասին

Եվրահանձնաժողովը նախազգուշացրել է, որ Իրանի շուրջ լարվածության և Օրմուզի նեղուցի հնարավոր երկարատև արգելափակման պայմաններում Եվրոպական միությունը կարող է բախվել ավիավառելիքի պակասի։ Այս մասին հայտնում է РИА Новости-ն՝ հղում անելով Եվրահանձնաժողովի հրապարակած տրանսպորտային առաջարկություններին։

Փաստաթղթում նշվում է, որ իրավիճակի սրումը կարող է լրջորեն ազդել ավիափոխադրումների վրա՝ ներառյալ թռիչքների չեղարկումները։ Եվրահանձնաժողովում նաև հայտնել են, որ Jet A տեսակի վառելիքի օգտագործման համար իրավական խոչընդոտներ չկան, թեև Եվրոպայում ավանդաբար կիրառվում է Jet A-1 ստանդարտը։ Նշվում է, որ ոլորտի բազմաթիվ ընկերություններ արդեն դիտարկում են այլընտրանքային տարբերակների կիրառումը։

Բացի այդ, Բրյուսելում հայտարարել են, որ երթուղիների փակումը կանխելու նպատակով եվրոպական ավիաընկերություններին կարող է թույլատրվել ժամանակավորապես շեղվել այն կանոնից, ըստ որի՝ վառելիքի առնվազն 90 տոկոսը պետք է լիցքավորվի ԵՄ օդանավակայաններում։ Ավելի վաղ գերմանական Lufthansa ավիաընկերությունը հայտարարել էր հազարավոր ոչ շահավետ չվերթների չեղարկման և 2026 թվականին վառելիքի ծախսերի շուրջ 1,7 միլիարդ եվրոյի աճի մասին։