Պուտին. Ռուսաստանը կդիմակայի ցանկացած փորձության

Ռուսաստանի նախագահ Վլադիմիր Պուտինը հայտարարել է, որ ռուս ժողովուրդը կարող է հաղթահարել ցանկացած փորձություն և դիմակայել բոլոր դժվարություններին։ Նա այս մասին ասել է Կարմիր հրապարակում անցկացված Հաղթանակի շքերթի ժամանակ՝ նվիրված Հայրենական մեծ պատերազմում հաղթանակի 81-րդ տարեդարձին։

Պուտինի խոսքով՝ Ռուսաստանի ուժը հիմնված է ժողովրդի բարոյական արժեքների, համախմբվածության, խիզախության և միասնականության վրա։ «Մեր հաջողության գրավականը մեր բարոյական ուժն է, մեր համախմբվածությունը և ցանկացած փորձություն հաղթահարելու կարողությունը», — հայտարարել է Ռուսաստանի նախագահը։

Վլադիմիր Պուտինը նաև բարձր է գնահատել խորհրդային ժողովրդի ներդրումը նացիզմի դեմ հաղթանակում և նշել, որ այսօր Ռուսաստանն ունի ընդհանուր նպատակ՝ հատուկ ռազմական գործողության առաջադրանքների իրականացումը։ Նրա խոսքով՝ երկրի յուրաքանչյուր քաղաքացի իր ներդրումն է ունենում թե՛ ռազմաճակատում, թե՛ թիկունքում։ Ելույթի ավարտին Պուտինը հայտարարել է. «Մեր գործը արդար է, մենք միասին ենք, հաղթանակը միշտ եղել է և միշտ կլինի մերը»։