Ինդոնեզիայում հրաբխի ժայթքումից հետո հայտնաբերել են անհետացած սինգապուրցիների գտնվելու վայրը

Ինդոնեզիայի իշխանությունները հայտնել են, որ հայտնաբերել են Դուկոնո հրաբխի ժայթքումից հետո անհետացած երկու Սինգապուրի քաղաքացիների գտնվելու վայրը։ Սակայն առայժմ անհայտ է՝ նրանք ողջ են, թե ոչ։ Այս մասին հայտնում է Reuters-ը։

Փրկարար ծառայության ղեկավար Իվան Ռամդանին հայտարարել է, որ անհետացածների կոորդինատները հայտնաբերվել են անօդաչու սարքերի միջոցով։ Նրա խոսքով՝ նրանք գտնվել են հրաբխի հիմնական խառնարանի եզրից մոտ 20-30 մետր հեռավորության վրա։ Միաժամանակ աղետների կառավարման գործակալության ներկայացուցիչ Աբդուլ Մուհարին նշել է, որ տվյալները համընկնում են ականատեսների ցուցմունքների հետ։

Դեպքը տեղի է ունեցել Հալմահերա կղզում գտնվող Դուկոնո հրաբխի ժայթքումից հետո, որի ընթացքում մոխրի սյունը բարձրացել էր մինչև 10 կիլոմետր։ Փրկարարական աշխատանքներին մասնակցում են ավելի քան 100 փրկարարներ, զինվորականներ և ոստիկաններ, ինչպես նաև երկու ջերմատեսիլ դրոն։ Տարածքը շարունակում է վտանգավոր մնալ՝ շարունակվող ժայթքումների և բարդ ռելիեֆի պատճառով։ Ինդոնեզիայի ոստիկանությունը նաև հետաքննում է զբոսաշրջային ընկերության գործողությունները, որը մարդկանց տարել էր հրաբուխ բարձրանալու՝ չնայած դեռ 2024 թվականից գործող արգելքին։