ԱՄՆ-ի և Իրանի միջև լարվածությունը նորից սրվել է․ Հորմուզի նեղուցում շարունակվում են բախումները

ԱՄՆ-ն ու Իրանը դեռ չեն մոտեցել ռազմական հակամարտության ավարտին, մինչ Հորմուզի նեղուցում շարունակվում են բախումները՝ նույնիսկ հրադադարի պայմաններում։ Այս մասին հայտնում է Reuters-ը՝ նշելով, որ վերջին օրերին տարածաշրջանում արձանագրվել են ամենախոշոր ռազմական միջադեպերը հրադադարի հայտարարումից ի վեր։

Իրանական աղբյուրների փոխանցմամբ՝ Հորմուզի նեղուցում շարունակվել են իրանական ուժերի և ամերիկյան նավերի միջև առանձին բախումները։ Միաժամանակ ԱՄՆ բանակը հայտարարել է, որ հարվածել է Իրանի հետ կապված երկու նավերի, որոնք փորձել էին մուտք գործել իրանական նավահանգիստ։ Ըստ Վաշինգտոնի՝ ամերիկյան կործանիչը վնասել է նավերի ծխնելույզները՝ ստիպելով փոխել ուղղությունը։ Նույն ժամանակահատվածում ԱՄԷ-ն հայտնել է, որ իր հակաօդային պաշտպանությունը որսացել է Իրանից արձակված երկու բալիստիկ հրթիռ և երեք դրոն, որոնց հետևանքով երեք մարդ վիրավորվել է։

Reuters-ը գրում է, որ ԱՄՆ-ը շարունակում է սպասել Իրանի պատասխանին պատերազմի դադարեցման առաջարկի վերաբերյալ, սակայն Թեհրանում հայտարարել են, որ դեռ ուսումնասիրում են առաջարկը։ Միևնույն ժամանակ ԿՀՎ-ի գնահատմամբ՝ Իրանը կարող է ԱՄՆ-ի ծովային շրջափակման պայմաններում դիմակայել առնվազն ևս չորս ամիս։ Ֆոնին ԱՄՆ-ը նաև նոր պատժամիջոցներ է սահմանել Իրանի հետ կապված մի շարք ընկերությունների և անձանց նկատմամբ, այդ թվում՝ Չինաստանում և Հոնկոնգում գործող կառույցների դեմ։