ՌԴ-ում մեկնաբանել են Թրամփի առաջարկած հրադադարը

Ռուսաստանի Դաշնության խորհրդում անդրադարձել են ԱՄՆ նախագահ Դոնալդ Թրամփի հայտարարությանը՝ Ռուսաստանի և Ուկրաինայի միջև հնարավոր հրադադարի վերաբերյալ։ Դաշնության խորհրդի միջազգային հարցերով հանձնաժողովի նախագահ Գրիգորի Կարասինը նշել է, որ եթե Թրամփը ցանկանում է, որպեսզի մայիսի 9-11-ը խաղաղ անցնի, ապա նման նախաձեռնությունը պետք է ողջունել։

«Եթե ԱՄՆ նախագահը ցանկանում է, որ այդ երեք օրերը խաղաղ անցնեն նաև Եվրոպայում, ապա նման ցանկությունը պետք է ողջունել։ Այլ հարց է՝ ում հետ է դա համաձայնեցվել և ինչի վրա է հիմնված, բայց ընդհանուր առմամբ նման տոնայնությունը դրական է», — հայտարարել է Կարասինը «Лента.ру»-ի հետ զրույցում։

Ավելի վաղ Դոնալդ Թրամփը հայտարարել էր, որ Ռուսաստանն ու Ուկրաինան համաձայնության են եկել մայիսի 9-11-ը հրադադար հաստատելու շուրջ։ Նրա խոսքով՝ այդ ընթացքում նախատեսվում է նաև ռազմագերիների փոխանակում «1000-ը՝ 1000-ի դիմաց» ձևաչափով։ Թրամփը նշել էր, որ անձամբ է այս առաջարկը փոխանցել Ռուսաստանի նախագահ Վլադիմիր Պուտինին և Ուկրաինայի նախագահ Վլադիմիր Զելենսկուն՝ հույս հայտնելով, որ տոնական հրադադարը կարող է դառնալ հակամարտության ավարտի սկիզբը։