Հորմուզի նեղուցի ճգնաժամի ֆոնին Չինաստանում նավթի ներմուծումը հասել է վերջին տարիների ամենացածր մակարդակին

Չինաստանում նավթի ներմուծումը ապրիլին կտրուկ նվազել է՝ Հորմուզի նեղուցի ճգնաժամի պատճառով։ Այս մասին հայտնում է Reuters-ը՝ հղում անելով Չինաստանի մաքսային ծառայության տվյալներին։

Պաշտոնական վիճակագրության համաձայն՝ ապրիլին Չինաստանը ներմուծել է 38,5 միլիոն տոննա նավթ, ինչը 20 տոկոսով պակաս է նախորդ տարվա նույն ժամանակահատվածի համեմատ։ Սա ամենացածր ցուցանիշն է 2022 թվականի հուլիսից ի վեր։ Reuters-ը նշում է, որ Չինաստանը նավթի մոտ կեսը ստանում է Մերձավոր Արևելքից, իսկ Հորմուզի նեղուցի փակման պատճառով կտրուկ նվազել է նավթ տեղափոխող տանկերների քանակը։

Մերձավոր Արևելքում իրավիճակի սրացման պատճառով Պեկինը նաև խստացրել է վառելիքի արտահանման վերահսկողությունը՝ ներքին շուկան պաշտպանելու նպատակով։ Արդյունքում բենզինի և ավիավառելիքի արտահանումը նվազել է մինչև վերջին մոտ տասը տարվա նվազագույն մակարդակը՝ կազմելով 3,1 միլիոն տոննա։ Միաժամանակ բնական գազի ներմուծումը ևս կրճատվել է 13 տոկոսով։ Չնայած ներմուծման անկմանը՝ փորձագետները նշում են, որ Չինաստանի նավթի պաշարները ապրիլին աճել են շուրջ 17 միլիոն բարելով։