Հանտավիրուսի մահացու շտամով վարակված ուղևորներին տեղափոխող զբոսանավը ժամանել է Թեներիֆե կղզի

Հանտավիրուսի մահացու բռնկման էպիկենտրոնում հայտնված կրուիզային լայները կիրակի վաղ առավոտյան ժամանել է իսպանական Տեներիֆե կղզի, որտեղից էլ կսկսվի ուղևորների հայրենիք վերադառնալու գործընթացը, հայտնում է NBC News-ը։

Առողջապահության համաշխարհային կազմակերպությունն ուրբաթ օրը հայտնել է, որ «Hondius» նավի բորտին եղել է հանտավիրուսով վարակման վեց հաստատված և երկու կասկածելի դեպք։

Պաշտոնական անձանց փոխանցմամբ՝ վարակվածներից երեքը մահացել են, ընդ որում՝ նրանցից երկուսը՝ հենց նավի բորտին: ԱՀԿ համաճարակների և համավարակների պատրաստվածության բաժնի ղեկավար, դոկտոր Մարիա Վան Կերխովը շաբաթ օրը հայտնել է, որ ափ իջնելուց հետո բոլոր ուղևորները, որոնք չունեն հիվանդության ախտանշաններ, փոքր նավակներով կտեղափոխվեն ցամաք, որտեղ կանցնեն բժշկական հետազոտություն: Նավի բորտին գտնվող 17 ամերիկացիները ինքնաթիռով կտեղափոխվեն Միացյալ Նահանգներ և կգտնվեն Ազգային կարանտինային բաժանմունքի հսկողության տակ: Օմահայի Նեբրասկա համալսարանի բժշկական կենտրոնի տարածքում գտնվող այս հաստատությունը մասնագիտացած է առավել վտանգավոր վարակիչ հիվանդություններ ունեցող պացիենտների բուժման մեջ, հայտնել են բժշկական կենտրոնից:

Իսպանիայի, Միացյալ Թագավորության և Ֆրանսիայի կառավարությունները միջոցներ են ձեռնարկել, որպեսզի նավի բորտին գտնվող իրենց քաղաքացիները վերադառնան հայրենիք և անցնեն կարանտինի կամ մեկուսացման:

Ըստ «Oceanwide Expeditions» կրուիզային օպերատորի տվյալների՝ Նիդերլանդներին պատկանող նավը, անձնակազմի մի մասի և ուղևորների ուղեբեռի հետ միասին, կշարունակի հնգօրյա ուղևորություն կատարել դեպի հոլանդական Ռոտերդամ նավահանգիստ:

Իսպանիայի առողջապահության նախարար Մոնիկա Գարսիան հայտնել է, որ նավի բորտին մահացած անձի մարմինը նույնպես կմնա նավում։ Նա նշել է, որ մարմինն ամբողջական ախտահանման կենթարկվի Նիդերլանդներում:

Առողջապահության նախարարության ներկայացուցիչներն ընդգծում են, որ համաշխարհային բնակչության և Արևմտյան Աֆրիկայի ափերի մոտ գտնվող Տեներիֆեի բնակիչների համար առկա ռիսկի մակարդակը դեռ փոքր է:

Շաբաթ օրը Տեներիֆեի բնակիչներին ուղղված իր ուղերձում ԱՀԿ գլխավոր տնօրեն Թեդրոս Ադհանոմ Գեբրեյեսուսը մտահոգություն է հայտնել վիրուսի տարածման վտանգի վերաբերյալ։ «2020 թվականի մարտահրավերները դեռևս արդիական են, և ես ոչ մի վայրկյան չեմ թերագնահատում դրանք,- ասել է Թեդրոսը,- բայց ինձ պետք է, որ դուք հստակ լսեք ինձ. սա հերթական COVID-ը չէ։ Ներկա պահին հանտավիրուսի հետ կապված հանրային առողջապահական ռիսկը մնում է ցածր։ Ես և իմ գործընկերները միանշանակ հայտարարել ենք այդ մասին, և ես հիմա կրկնում եմ դա ձեզ համար»։

Վիրուսների այս խմբից հայտնի է, որ միայն «Անդյան» շտամն է (որը հայտնաբերվել է «Hondius»-ի պարագայում) փոխանցվում մարդուց մարդուն, սակայն, ԱՀԿ տվյալներով, դա սովորաբար տեղի է ունենում միմյանց հետ շատ սերտ կապեր ունեցող անձանց շրջանում։ Մայիսի 2-ին՝ Արգենտինայի Ուշուայա քաղաքից նավի դուրս գալուց մեկ ամիս անց, Առողջապահության համաշխարհային կազմակերպությունը հաղորդում է ստացել բորտում գտնվող «ծանր շնչառական հիվանդություններ ունեցող ուղևորների խմբի» մասին։

Այդ ժամանակ նավում եղել է 147 ուղևոր և անձնակազմի անդամ, սակայն, ըստ ԱՀԿ-ի, 34 հոգի ավելի վաղ արդեն ափ են իջել։

Այս մասին հաղորդվել է նավի բորտին գրանցված առաջին մահվան դեպքից մի քանի շաբաթ անց։ Դեպքը տեղի է ունեցել ապրիլի 11-ին և մահացել էր մի նիդերլանդացի: Այդ ժամանակ «մահվան պատճառն անհայտ էր, և նավում վիրուսի կամ վարակի որևէ նշան չկար»,- ասված է «Oceanwide Expeditions»-ի հաղորդագրության մեջ:

Ըստ ԱՀԿ տվյալների՝ նրա կինը մահացել է ապրիլի 26-ին հարավաֆրիկյան կլինիկաներից մեկում: ԱՀԿ-ն և «Oceanwide Expeditions»-ը հայտնում են նաև երրորդ մահվան դեպքի մասին. մայիսի 2-ին նավի բորտի վրա մահացել է մի գերմանուհի:

Երկու օր անց հանտավիրուս է հաստատվել մի ուղևորի մոտ, որը բժշկական ցուցումով տարհանվել և տեղափոխվել է Հարավային Աֆրիկայի հիվանդանոցներից մեկը, հայտնել են ընկերությունից:

ԱՀԿ տվյալներով՝ հանտավիրուսից մահացությունը հասնում է 40-50%-ի, իսկ ռիսկի խմբում հիմնականում տարեցներն են։ Հատկանշական է, որ լայների ուղևորների միջին տարիքը 65-ն է։