Եվրահանձնաժողովը պատրաստվում է Ուկրաինային փոխանցել առաջին խոշոր ֆինանսական տրանշը

Եվրահանձնաժողովի ընդլայնման հարցերով հանձնակատար Մարտա Կոսը հայտարարել է, որ Ուկրաինան արդեն առաջիկա շաբաթվա ընթացքում կարող է ստանալ եվրոպական ռազմական ֆինանսավորման ծրագրի առաջին տրանշը։ Նրա խոսքով՝ խոսքը վերաբերում է բազմամիլիարդանոց աջակցության փաթեթին, որը նախատեսված է Կիևի ռազմական և ֆինանսական կարիքների ապահովման համար։

Մարտա Կոսը այս հայտարարությունն արել է Եվրամիության անդամ երկրների արտգործնախարարների հանդիպման ընթացքում։ Նա նշել է, որ Եվրահանձնաժողովը մտադիր է հնարավորինս արագ սկսել միջոցների փոխանցումը, որպեսզի Ուկրաինան շարունակի ստանալ անհրաժեշտ աջակցությունը պատերազմի պայմաններում։

Ավելի վաղ եվրոպական աղբյուրները հայտնել էին, որ Եվրամիությունը Կիևին տրամադրելու է շուրջ 90 միլիարդ եվրոյի ֆինանսական աջակցություն, իսկ առաջին վճարումը նախատեսվում էր իրականացնել մայիսի վերջին կամ հունիսի սկզբին։ Մինչ այդ Ուկրաինայի ընթացիկ ֆինանսական պահանջները նախատեսվում է ծածկել այլ միջազգային դոնորների միջոցով։