«Սա COVID չէ». մահաբեր հանտավիրուսի բռնկումից հետո տարհանում են «MV Hondius» նավի վերջին ուղևորներին

Իսպանիայի իշխանությունները ավարտին են մոտեցնում հանտավիրուսի բռնկմամբ հայտնի դարձած «MV Hondius» զբոսանավի ուղևորների տարհանումը։ Reuters-ի փոխանցմամբ՝ նավից տարհանված երկու ուղևորների՝ Ֆրանսիայի և ԱՄՆ-ի քաղաքացիների մոտ արդեն հաստատվել է վիրուսի առկայությունը։ Ֆրանսիայի առողջապահության նախարար Ստեֆանի Ռիստը հայտնել է, որ վարակված ֆրանսուհու առողջական վիճակը վատթարանում է, իսկ ԱՄՆ առողջապահության նախարարությունը նշել է, որ ամերիկացի ուղևորներից մեկի մոտ հայտնաբերվել է վիրուսի «Անդյան» շտամը։

Ներկայումս նավի վրա մնացած վերջին 24 ուղևորները պետք է տարհանվեն Իսպանիայի Տեներիֆե կղզուց։ Արդեն 94 մարդ վերադարձվել է իրենց երկրներ, իսկ Առողջապահության համաշխարհային կազմակերպությունը բոլոր ուղևորների համար խորհուրդ է տվել սահմանել 42-օրյա կարանտին։ Բռնկման հետևանքով մահացել է երեք մարդ՝ Նիդեռլանդների քաղաքացիներ ամուսնական զույգ և մեկ Գերմանիայի քաղաքացի։ Տարհանումից հետո նավը կուղևորվի Նիդեռլանդներ, որտեղ այն ամբողջությամբ ախտահանվելու է։

Առողջապահական կառույցները փորձում են խուսափել խուճապից և ընդգծում են, որ հանտավիրուսը շատ ավելի քիչ վարակիչ է, քան COVID-19-ը։ ԱՄՆ Հիվանդությունների վերահսկման կենտրոնի ժամանակավոր ղեկավար Ջեյ Բհատտաչարյան հայտարարել է․ «Սա COVID չէ, և մենք չենք պատրաստվում դրան վերաբերվել ինչպես COVID-ի»։ Իսպանիայի առողջապահության նախարարությունն էլ նշել է, որ նավի վրա կրծողներ չեն հայտնաբերվել, իսկ բնակչության համար ընդհանուր վտանգը շարունակում է գնահատվել որպես ցածր։