Գերմանիան որոշել է ԱԹՍ-ների դեմ նորարարական «պաշտպանիչ վահան» մշակել

Գերմանիայում Rheinmetall-ը և Deutsche Telekom-ը կհամագործակցեն՝ անօդաչու թռչող սարքերի դեմ «պաշտպանիչ վահան» ստեղծելու համար։ Այս մասին հայտարարել է պաշտպանական ընկերությունը Բոննում կայանալիք AFCEA ցուցահանդեսից առաջ։ Գործընկերները մտադիր են համատեղ ապահովել գերմանական քաղաքների և կարևորագույն ենթակառուցվածքների անվտանգությունը, հաղորդում է ՌԻԱ Նովոստին՝ հղում անելով երկու ընկերությունների հայտարարություններին։

Պաշտոնական համաձայնագիրը ձեռք է բերվել Բոննում մայիսի 12-ին բացվող AFCEA ցուցահանդեսի նախօրեին։

Մշակվող համակարգը նպատակ ունի անօդաչու թռչող սարքերի վաղ հայտնաբերմանը և դրանց ճնշմանը՝ օգտագործելով երեք մեթոդ՝ ռադիոազդանշանների խլացում, անօդաչու թռչող սարքերի խափանում կամ լազերային համակարգեր՝ առանց հակաօդային զենքերի օգտագործման։ Deutsche Telekom-ը պատասխանատու է բջջային ցանցերի և թվային ծրագրերի համար, մինչդեռ Rheinmetall-ը պատասխանատու է սենսորների և զենքի, այդ թվում՝ լազերների համար։

«Անօդաչու թռչող սարքերի սպառնալիքը խորապես թվային է, ուստի մենք պետք է համատեղենք սենսորները, զենքը և անվտանգ կապի ցանցերը», - բացատրել է Rheinmetall-ի գործադիր տնօրեն Արմին Պապերգերը։