Դատարանը ճանաչեց Գագիկ Ծառուկյանի անմեղությունը

Հակակոռուպցիոն դատարանը ճանաչել է Գագիկ Ծառուկյանի անմեղությունը։

Ինչպես մանրամասնում է «Առավոտ»-ը,  Հակակոռուպցիոն դատարանում ԲՀԿ առաջնորդ Գագիկ Ծառուկյանի և «Մուլտի Գրուպ Կոնցեռն» ՍՊԸ տնօրեն Սեդրակ Առուստամյանի գործով այսօրվա դատական նիստին հանրային մեղադրողը և մեղադրյալ Գագիկ Ծառուկյանը չէին ներկայացել։ Ծառուկյանի պաշտպանը դատարանին տեղեկացրել էր, որ իր պաշտպանյալը նիստին չի կարող ներկա գտնվել հունիսի 7-ին կայանալիք ԱԺ ընտրությունների քարոզարշավին մասնակցելու պատճառով։ Նախագահող դատավոր Արամ Գրիգորյանը կողմերին հիշեցրել է, որ դատական նիստում այլևս քննարկման հարց չկա, լրացուցիչ դատալսումներն ավարտված են, ուստի դատարանը հեռանում է առանձին սենյակ՝ դատավճիռ կայացնելու համար, որը կհրապարակվի մոտ 30 րոպեից։

Վերադառնալով դատական նիստերի դահլիճ՝ դատավոր Արամ Գրիգորյանը հրապարակել է վճիռը․ «Ճանաչել և հռչակել Գագիկ Ծառուկյանի անմեղությունը և Գագիկ Ծառուկյանին արդարացնել մեղսագրվող արարքը նրա կողմից կատարված չլինելու պատճառաբանությամբ»։ Գագիկ Ծառուկյանի նկատմամբ որպես խափանման միջոց կիրառված գրավը՝ 100 միլիոն դրամի չափով, վերադարձնել գրավը մուծած անձին։

Դատարանը Սեդրակ Առուստամյանին ճանաչել է մեղավոր, սակայն համապատասխան հոդվածով նախատեսված պատիժ չնշանակեց վաղեմության ժամկետն անցնելու հիմքով։