ԵՄ-ն փորձում շահագործել ՀՀ-ում կայանալիք ընտրություններն իր սեփական աշխարհաքաղաքական նպատակների համար․ ՌԴ ԱԳՆ

Հայաստանի եվրոպական ուղին կարող է հանգեցնել Մոսկվայի հետ հարաբերություններում համակարգային փոփոխությունների։ Այդ մասին TASS-ին տված հարցազրույցում հայտարարել է ՌԴ ԱԳՆ ԱՊՀ երկրների չորրորդ վարչության տնօրեն Միխայիլ Կալուգինը։

Դիվանագետին խնդրել էին մեկնաբանել ՌԴ փոխվարչապետ Ալեքսեյ Օվերչուկի խոսքերը, ըստ որոնց Հայաստանը չափազանց մոտ է հասել այն կետին, որից հետո Ռուսաստանը ստիպված կլինի նոր ձևով կառուցել հարաբերությունները այդ երկրի հետ։
«Ռուսաստանի Դաշնության կառավարության նախագահի տեղակալ Ալեքսեյ Օվերչուկի հայտարարությունը, որին դուք ուշադրություն դարձրիք, այն ազդակների օրինակներից է, որոնք մենք տարբեր մակարդակներով փոխանցել և շարունակում ենք փոխանցել Հայաստանի ղեկավարությանը և հանրությանը», — պարզաբանել է նա։

«Մենք կարծում ենք, որ մեր երկրների քաղաքացիները պետք է իմանան. Երևանի առաջխաղացումը եվրոպական ճանապարհով կարող է ինչ-որ պահի հանգեցնել ռուս-հայկական հարաբերություններում համակարգային փոփոխությունների», — նշել է Կալուգինը։

Վարչության ղեկավարը նաև ընդգծել է, որ «անվտանգության ապահովման, տնտեսական կայունության, բարեկեցության և բարգավաճման գործիքների առումով, որոնցից կազմավորվում է երկրի ինքնիշխանությունը, ԵՄ-ն որևէ հստակ այլընտրանք չի առաջարկում»։
«Եվ դա հասկանալի է․ Բրյուսելի հետաքրքրությունը ոչ թե Հայաստանի կամ Հարավային Կովկասի երկրների հանդեպ հոգատարությունն է, այլ առաջին հերթին սեփական աշխարհաքաղաքական խնդիրների լուծումը, որոնք այսօր ուղղված են Ռուսաստանի հետ դիմակայությանը», — եզրափակել է դիվանագետը։