Եգիպտոսը փոխում է մուտքի կարգը զբոսաշրջիկների համար․ թղթային վիզաները կվերանան

Եգիպտոսի իշխանությունները պատրաստվում են փոխել զբոսաշրջիկների մուտքի համակարգը և հրաժարվել թղթային վիզաներից։ Ինչպես հայտնում է Ռուսաստանի տուրօպերատորների ասոցիացիան (АТОР)՝ հղում անելով երկրի զբոսաշրջության նախարար Շերիֆ Ֆաթհիին, նոր համակարգը հիմնված կլինի շտրիխ-կոդերի օգտագործման վրա։

Նախարարը նշել է, որ թղթային միգրացիոն քարտերի լրացումը խնդիրներ է ստեղծում զբոսաշրջիկների համար, իսկ նոր համակարգը պետք է հեշտացնի երկիր մուտք գործելու գործընթացը։ Նորամուծությունը նախատեսվում էր ներդնել դեռ հունվարի վերջին, սակայն այն ժամանակ որոշումը հետաձգվել էր՝ անցումային փուլում հնարավոր լրացուցիչ վճարների պատճառով։

Ինչպես գրում է АТОР-ը, Եգիպտոսը նաև փորձում է ավելացնել միջազգային ավիաչվերթների թիվը և վերացնել այն խոչընդոտները, որոնք դժվարացնում են զբոսաշրջիկների ազատ մուտքը երկիր։ Ավելի վաղ հայտնի էր դարձել, որ ռուս զբոսաշրջիկները առաջին տեղում են Եգիպտոսի ամենահայտնի հանգստավայրերից մեկի՝ Շարմ էլ-Շեյխի այցելությունների թվով։