Ռուսաստանը սպասում է ներդրումների նոր անկման․ տնտեսության աճի կանխատեսումները վատացել են

Ռուսաստանի կառավարությունը պատրաստվում է 2026 թվականին ներդրումային ակտիվության շարունակական անկմանը։ Ինչպես «Ведомости»-ին տված հարցազրույցում հայտարարել է ՌԴ փոխվարչապետ Ալեքսանդր Նովակը, իշխանությունները հույս ունեն, որ միայն 2027 թվականից տնտեսությունը կվերադառնա աճի փուլ։

Նովակի խոսքով՝ ներդրումների վերականգնման համար անհրաժեշտ է բարելավել բիզնես միջավայրը, նվազեցնել ծախսերը և ապահովել սեփականության իրավունքների պաշտպանությունը։ Նա ընդգծել է, որ առանց կանխատեսելի իրավական համակարգի և հստակ տնտեսական կանոնների, բիզնեսի մի մասը կհրաժարվի երկարաժամկետ ներդրումային նախագծերից։ Միաժամանակ Ռուսաստանի կառավարությունը կտրուկ վատացրել է 2026 թվականի տնտեսական աճի կանխատեսումը՝ այն նվազեցնելով մինչև ընդամենը 0,4 տոկոս։

Ինչպես գրում է «Ведомости»-ն, ռուսական իշխանությունները նաև ընդունում են, որ մինչև 2029 թվականը սոցիալ-տնտեսական զարգացման գնահատականները դարձել են ավելի պահպանողական։ Գնաճի 4 տոկոս նպատակային ցուցանիշին հասնելը հետաձգվել է մինչև 2027 թվական, իսկ այս տարի կառավարությունը սպասում է 5,2 տոկոս գնաճ։ Նույն հարցազրույցում Նովակը հայտարարել է նաև, որ վերջին երեք տարիներին բնակչության իրական եկամուտներն աճել են 26,1 տոկոսով, սակայն զգուշացրել է, որ արագ աճից հետո տնտեսությունում սկսվում է «ճշգրտման փուլ»։