Ռուսաստանը հայտարարում է հրադադարի ավելի քան 30 հազար խախտման մասին

Ռուսաստանի պաշտպանության նախարարությունը հայտարարել է, որ Ուկրաինայի զինված ուժերը տասնյակ հազարավոր անգամներ խախտել են մայիսի 8-11-ը հայտարարված հրադադարի ռեժիմը։ Ինչպես հաղորդվել է գերատեսչության ամենօրյա ճեպազրույցի ընթացքում, ընդհանուր առմամբ արձանագրվել է 30 383 խախտում։

Ռուսական կողմի տվյալներով՝ նույնիսկ կրակի դադարեցման պայմանավորվածությունների ընթացքում ուկրաինական բանակը շարունակել է հարվածներ հասցնել անօդաչու թռչող սարքերի միջոցով և հրետակոծել ռուսական դիրքերը։ Պաշտպանության նախարարությունը պնդում է, որ հրադադարի ամբողջ ընթացքում մարտական ակտիվությունը լիովին չի դադարել։

Ռուսաստանի ռազմական գերատեսչությունը նաև ընդգծել է, որ իրավիճակը շարունակում է մնալ լարված հատուկ ռազմական գործողության գոտում։ Մոսկվան մինչ այժմ բազմիցս մեղադրել է Կիևին հրադադարի պայմանները խախտելու մեջ, մինչդեռ ուկրաինական կողմը նույնպես պարբերաբար հայտարարում է ռուսական հարվածների շարունակման մասին։