Պաշտոնյայի ծխախոտի տուփում կոկաին են հայտնաբերել․ դատարանը վճիռ է կայացրել

Սանկտ Պետերբուրգի Լենինյան շրջանային դատարանը դատավճիռ է կայացրել քաղաքի մշակույթի կոմիտեի մամուլի քարտուղարի գործով, որի մոտ անձնական խուզարկության ընթացքում կոկաին էր հայտնաբերվել։ Այս մասին հայտնել է Սանկտ Պետերբուրգի դատարանների միացյալ մամուլի ծառայության ղեկավար Դարյա Լեբեդևան։

Դատարանի որոշմամբ՝ պաշտոնյան մեղավոր է ճանաչվել թմրամիջոցների ապօրինի շրջանառության հոդվածով։ Ինչպես հայտնում են ռուսական լրատվամիջոցները, մարտի 27-ին նրա Camel տեսակի ծխախոտի տուփում հայտնաբերվել է 1,69 գրամ կոկաին, որը, ըստ քննության, պահվում էր անձնական օգտագործման նպատակով։ Մեղադրյալը դատարանում ընդունել է մեղքը և զղջացել։

Դատարանը նրան դատապարտել է 4 տարվա պայմանական ազատազրկման՝ 3 տարվա փորձաշրջանով։ Վճիռ կայացնելիս հաշվի է առնվել նաև նրա աշխատանքի վայրից ստացված դրական բնութագիրը։ Ավելի վաղ ռուսական մամուլը հայտնել էր նաև մեկ այլ աղմկահարույց գործի մասին, որտեղ Սանկտ Պետերբուրգի ոստիկանության մամուլի ծառայության աշխատակիցը կասկածվում էր մարիխուանայի և կոկաինի տարածման մեջ։