Գերմանական Rheinmetall-ը մեծացնում է կամիկաձե դրոնների արտադրությունը

Գերմանիայի խոշորագույն պաշտպանական կոնցեռնը՝ Rheinmetall, հայտարարել է նոր կամիկաձե դրոնների արտադրության ընդլայնման մասին։ Ինչպես հայտնում է ТАСС-ը՝ հղում անելով գերմանական մամուլին, ընկերության ղեկավար Արմին Պապերգերը հայտարարել է, որ Նոյս քաղաքում գործարկվել է մարտական անօդաչու սարքերի նոր արտադրական գիծ։

Խոսքը մինչև 100 կիլոմետր հեռահարություն ունեցող դրոնի մասին է, որը կարող է օդում մնալ շուրջ 70 րոպե, այնուհետև խոցել թիրախը և պայթել։ Դրոնը նախատեսված է նաև հետախուզական գործողությունների համար՝ հնարավորություն տալով վերահսկել տարածքը և ընտրել հարվածի օբյեկտը։ Ընկերության ղեկավարի խոսքով՝ սարքի մշակումը տևել է ընդամենը մի քանի ամիս, իսկ դրա մարտական մասը արտադրվում է Իտալիայում, ինչի շնորհիվ ամբողջ արտադրական գործընթացը կենտրոնացված է Եվրամիության ներսում։

Ինչպես նշում են գերմանական աղբյուրները, Rheinmetall-ը Ուկրաինայում պատերազմի սկսվելուց հետո զգալիորեն ընդլայնել է ռազմական տեխնիկայի և զինամթերքի արտադրությունը՝ շարունակելով ակտիվ համագործակցությունը Կիևի հետ։ Բացի այդ, ընկերությունը Ուկրաինայի տարածքում կառուցում է զինամթերքի արտադրության գործարան, իսկ առաջիկայում նախատեսում է նաև սկսել FV-014 մոդելի նոր դրոնների թողարկումը, որոնց համար Գերմանիայի բանակը արդեն 300 միլիոն եվրոյի պատվեր է տվել։