ՌԴ. խոցված շվեդական Saab 340-ը օգտագործվում էր Ռուսաստանի դեմ հարվածներ համակարգելու համար

Ռուս ռազմական փորձագետ Բորիս Ջերելիևսկին հայտարարել է, որ Ռուսաստանի զինված ուժերի կողմից խոցված ուկրաինական Saab 340 հեռահար ռադիոլոկացիոն հետախուզական ինքնաթիռը կիրառվում էր Ռուսաստանի տարածքի դեմ հարվածներ կազմակերպելու նպատակով։ Նրա խոսքերը փոխանցում է ռուսական «Взгляд» թերթը։

Փորձագետի խոսքով՝ Saab 340-ը նախատեսված էր օդային և ցամաքային թիրախներ հայտնաբերելու, ինչպես նաև հարվածային միջոցները դրանց ուղղորդելու համար։ Ջերելիևսկին նշել է, որ նման ինքնաթիռի ոչնչացումը մեծ հաջողություն է ռուսական բանակի համար և ենթադրել, որ այն կարող էր օգտագործվել Ռուսաստանի տարածքում գտնվող օբյեկտների դեմ հարվածների կոորդինացման նպատակով։ Նա նաև չի բացառել, որ խոցված ինքնաթիռում կարող էին գտնվել շվեդ մասնագետներ։

Ավելի վաղ «Операция Z: Военкоры Русской Весны» Telegram-ալիքը հայտնել էր, որ ռուսական հինգերորդ սերնդի Sukhoi Su-57 կործանիչը խոցել է Ուկրաինային փոխանցված շվեդական Saab 340 ինքնաթիռը։ Իսկ մարտին TWZ պարբերականը գրել էր, որ այդ օդանավը նկատվել է Ուկրաինայի օդային տարածքում։