Գիտնականները զգուշացնում են՝ Երկրին մոտենում է «սուպեր Էլ-Նինյո»-ն

Մոտակա ամիսներին Երկրի վրա կարող է սկսվել Էլ-Նինյո կլիմայական երևույթի նոր և հատկապես հզոր փուլը։ Ինչպես գրում է New-Science.ru-ն, գիտնականները կանխատեսում են, որ առաջիկա գործընթացը կարող է դառնալ 21-րդ դարի ամենաուժեղներից մեկը և արդեն ստացել է «սուպեր Էլ-Նինյո» անվանումը։

Մասնագետների գնահատմամբ՝ այդ երևույթը կարող է հանգեցնել ռեկորդային բարձր ջերմաստիճանների, կլիմայական կտրուկ փոփոխությունների և խոշոր ջրհեղեղների աշխարհի տարբեր հատվածներում։ Կանխատեսումների համաձայն՝ մինչև 2026 թվականի հունիս Էլ-Նինյոյի վերադարձի հավանականությունը գնահատվում է 70 տոկոս, իսկ տարվա վերջում դրա պահպանման հավանականությունը՝ 94 տոկոս։

Ներկայում կլիմայական համակարգը Լա-Նինյա փուլից անցում է կատարում չեզոք վիճակի։ Գիտնականները հիշեցնում են, որ Էլ-Նինյոն և Լա-Նինյան ամենակարևոր գլոբալ կլիմայական գործընթացներից են, որոնք փոխարինում են միմյանց յուրաքանչյուր 2-7 տարին մեկ և ազդում ամբողջ աշխարհի եղանակային պայմանների վրա։ Ավելի վաղ մասնագետները նշել էին, որ «սուպեր Էլ-Նինյո»-ի ազդեցությունը հատկապես զգալի կարող է դառնալ 2026 թվականի ձմռանը։