Նեյրոցանցը բացահայտել է 27 տարվա վաղեմության սպանությունը

Մոսկվայում արհեստական բանականության օգնությամբ հաջողվել է բացահայտել նախկին շրջանային դատախազ Վիտալի Տիխոմիրովի և նրա կնոջ՝ Վիկտորիայի սպանությունը, որը կատարվել էր դեռ 1998 թվականին։ Ինչպես KP.RU-ին հայտնել է Ռուսաստանի Քննչական կոմիտեի հատկապես կարևոր գործերով քննիչ Ալլա Մորոզենկոն, գործի բացահայտման մեջ վճռորոշ դեր է ունեցել նեյրոցանցը։

Քննության տվյալներով՝ ամուսիններին գտել էին իրենց բնակարանում՝ կապված վիճակում և բազմաթիվ դանակի հարվածներով։ Տանը ամեն ինչ տակնուվրա էր արված, իսկ հանցագործները տարել էին մորթյա վերարկու և 19-րդ դարի սրբապատկեր։ Տարիներ շարունակ քննիչներին չէր հաջողվում գտնել կասկածյալներին, քանի որ դեպքի վայրում հայտնաբերված մատնահետքերը վնասված և ոչ հստակ էին։

Միայն 2025 թվականին մասնագետները որոշել են օգտագործել արհեստական բանականություն, որը «վերականգնել» է վնասված մատնահետքերի հնարավոր պատկերները և համեմատել դրանք դաշնային բազայի տվյալների հետ։ Արդյունքում իրավապահները դուրս են եկել 59-ամյա Սերգեյ Լապշինի հետքի վրա, ով անմիջապես խոստովանել է 27 տարվա վաղեմության հանցագործությունը։ Նրա խոսքով՝ հարձակումը կազմակերպվել էր մի կնոջ խնդրանքով, որը պարտքեր ուներ հանցավոր խմբավորումների նկատմամբ և որոշել էր թալանել Տիխոմիրովների ընտանիքը։