Ֆրանսիայում անհանգստացած են վտանգավոր վիրուսի հնարավոր մուտացիայից

Ֆրանսիայի առողջապահության նախարար Ստեֆանի Ռիստը հայտարարել է, որ մասնագետները դեռ չեն կարող հաստատել՝ արդյոք հանտավիրուսը ենթարկվել է մուտացիայի։ Ինչպես հայտնում է Sky News-ը, ֆրանսիական կողմը դեռ չունի բավարար տվյալներ վերջնական եզրակացություններ անելու համար։

Նախարարի խոսքով՝ գիտնականները դեռ ամբողջությամբ չեն վերծանել վիրուսի գենետիկական հաջորդականությունը, ինչի պատճառով հնարավոր չէ վստահ ասել՝ արդյոք վիրուսը փոփոխվել է, թե ոչ։ Նա ընդգծել է, որ իրավիճակը շարունակում է ուսումնասիրվել։

Ավելի վաղ Ֆրանսիայում հաստատվել էր հանտավիրուսով վարակման առաջին դեպքը։ Բացի այդ, երկրում հայտնաբերվել է 22 մարդ, ովքեր շփվել են վարակված անձանց հետ։ Մայիսի սկզբին նաև հայտնի էր դարձել, որ Արգենտինայից Կաբո Վերդե ուղևորվող MV Hondius զբոսանավում վտանգավոր վիրուսի բռնկում էր տեղի ունեցել, որի հետևանքով մահացել էր երեք մարդ։