Վլադիմիր Պրեսնյակովը խոստովանել է՝ ալկոհոլից հրաժարվելուց հետո կորցրել է ընկերների մեծ մասին

Ռուս երգիչ Վլադիմիր Պրեսնյակովը պատմել է, որ ալկոհոլից հրաժարվելու որոշումից հետո իր շրջապատից շատ մարդիկ հեռացել են։ Այդ մասին նա խոսել է ռուս ռեփեր Բաստայի «Вопрос ребром» հաղորդման ընթացքում։

Պրեսնյակովի խոսքով՝ երիտասարդ տարիներին ինքը ընկերների հետ օրական մինչև ինը շիշ կոնյակ էր խմում։ Նրա խոսքերով՝ ալկոհոլը որոշ ժամանակ «հանգստացնում» էր իր էներգիան, սակայն հետագայում դա վերածվել էր կախվածության։ Երգիչը նշել է, որ վերջնականապես որոշել է դադարեցնել խմելը, քանի որ ամաչում էր ընտանիքի և երեխաների առաջ։

Արտիստը նաև խոստովանել է, որ սթափ կյանք սկսելուց հետո նախկին ընկերական շրջապատից շատ քչերն են մնացել իր կողքին։ Նա նշել է, որ մտերիմ հարաբերություններ պահպանել է միայն մի քանի մարդկանց հետ, որոնց թվում են ռուս երգիչներ Լեոնիդ Ագուտինը և Իգոր Նիկոլաևը։