Վիրաբույժը սխալմամբ հեռացրել է հիվանդի առողջ օրգանը․ հիվանդը մահացել է

ԱՄՆ Ֆլորիդա նահանգում բժիշկ Թոմաս Շակնովսկին հայտնվել է դատարանում այն բանից հետո, երբ վիրահատության ընթացքում հիվանդի փայծաղի փոխարեն հեռացրել է առողջ լյարդը, ինչի հետևանքով 70-ամյա Ուիլյամ Բրայանը մահացել է։ Ինչպես հայտնում է New York Post-ը, դեպքը տեղի է ունեցել դեռ 2024 թվականի օգոստոսին։

Ըստ հրապարակման՝ վիրահատությունից հետո բժիշկը հայտարարել էր, թե ամեն ինչ հաջող է անցել, սակայն կարճ ժամանակ անց հիվանդի մոտ ուժեղ ներքին արյունահոսություն էր սկսվել։ Բժիշկների թիմին չի հաջողվել փրկել տարեց տղամարդու կյանքը։ Ավելի ուշ Շակնովսկու դեմ մեղադրանք է առաջադրվել բժշկական անփութության պատճառով մահ պատճառելու հոդվածով։

Դատարանում բժիշկը փորձել է արդարացնել իր գործողությունները՝ ասելով, որ վիրահատությունը շատ բարդ էր, իսկ հիվանդի հաստ աղիքի մեծացման պատճառով ինքը չի կարողացել տարբերել օրգանները։ Հետաքննության ընթացքում պարզվել է նաև, որ սա բժշկի արդեն երրորդ ճակատագրական սխալն էր վերջին մեկուկես տարվա ընթացքում։ Նախկինում նա սխալմամբ հեռացրել էր ենթաստամոքսային գեղձի մի մասը և մեկ այլ հիվանդի կատարել մահվան պատճառ դարձած սխալ վիրահատություն։ Նրա գործընկերները նախկինում արդեն ահազանգել էին, որ Շակնովսկին վտանգավոր է հիվանդների համար։