AFP. Չինաստանը, հնարավոր է, փոխել է Ռուբիոյի անվան ուղղագրությունը, որպեսզի նա կարողանա այցելել երկիր

Չինաստանի իշխանությունները, հնարավոր է, փոխել են ԱՄՆ պետքարտուղար Մարկո Ռուբիոյի անվան ուղղագրությունը չինարեն լեզվով, որպեսզի նա կարողանա այցելել Պեկին՝ չնայած նրա նկատմամբ սահմանված անձնական պատժամիջոցներին, հաղորդում է Agence France-Presse-ը՝ հղում անելով անանուն դիվանագետների։

Ինչպես հիշեցնում է գործակալությունը, Չինաստանի իշխանությունները երկու անգամ պատժամիջոցներ են կիրառել Ռուբիոյի դեմ, երբ նա դեռ սենատոր էր։ 2025 թվականից ի վեր, երբ Ռուբիոն դարձավ պետքարտուղար, Չինաստանի կառավարական գործակալություններն ու պաշտոնական լրատվամիջոցները փոխել են նրա անվան չինարեն ուղղագրության նիշերից մեկը։

Գործակալության աղբյուրների համաձայն, Չինաստանի իշխանությունները այս քայլին են դիմել՝ Ռուբիոյի դեմ պատժամիջոցներ կիրառելուց խուսափելու համար, քանի որ նրա անունը պատժամիջոցների ցուցակներում տարբեր կերպ է գրվում։

Վաշինգտոնում Չինաստանի դեսպանատան մամուլի խոսնակ Լյու Պենգյուն գործակալությանը միայն ասել է, որ «Ռուբիոյի դեմ պատժամիջոցները սահմանվել են Չինաստանի հետ կապված և սենատորի պաշտոնավարման ընթացքում կատարված խոսքերի և գործողությունների համար»։