Սովորական խալը կարող է մահացու լինել․ ուռուցքաբանը բացատրել է՝ ինչպես ճանաչել մելանոման

Ռուս ուռուցքաբան Սունա Իսակովան հայտնել է, որ սովորական խալն ու մելանոման հնարավոր է տարբերել նույնիսկ տնային պայմաններում՝ հետևելով մի քանի կարևոր փոփոխությունների։ Բժշկի խոսքով՝ ամենաարդյունավետ ինքնաստուգման մեթոդը կոչվում է ABCDE և ներառում է հինգ չափանիշ՝ ասիմետրիա, եզրերի ձև, գույն, չափ և նոր ախտանիշների ի հայտ գալը, գրում է Lenta.ru-ն։

Մասնագետը նշել է, որ անհանգստացնող նշաններ են համարվում անհարթ կամ ոչ հստակ եզրերով խալերը, տարբեր գույների առկայությունը, արագ մեծացումը կամ 6 միլիմետրից ավելի չափը։ Նա ընդգծել է, որ նույնիսկ փոքր փոփոխությունները կարող են վտանգավոր լինել, հատկապես եթե առաջանում են քոր, արյունահոսություն կամ հանգույցներ։

Իսակովայի խոսքով՝ ABCDE համակարգը չի փոխարինում բժշկական հետազոտությանը, սակայն օգնում է ժամանակին նկատել հնարավոր վտանգը։ Բժիշկը կոչ է արել չհետաձգել մասնագետի այցը, քանի որ մելանոմայի վաղ հայտնաբերումը զգալիորեն բարձրացնում է հաջող բուժման հնարավորությունները։