Եվրոպան կարող է հայտնվել ամերիկյան գազից վտանգավոր կախվածության մեջ

Եվրոպական երկրները առաջիկա տարիներին կարող են չափազանց մեծ կախվածության մեջ ընկնել ամերիկյան հեղուկացված բնական գազից (LNG), հայտնում է Reuters-ը՝ հղում անելով Էներգետիկ տնտեսության և ֆինանսական վերլուծության ինստիտուտի (IEEFA) կանխատեսմանը։ Փորձագետների գնահատմամբ՝ արդեն 2028 թվականին Եվրոպա ներմուծվող LNG-ի շուրջ 80 տոկոսը բաժին կհասնի ԱՄՆ-ին։

Վերլուծաբանները զգուշացնում են, որ նման կախվածությունը լուրջ ռիսկեր է ստեղծում եվրոպական շուկայի համար, քանի որ ամերիկյան մատակարարները կկարողանան փաստացի թելադրել գների պայմանները։ Արդեն 2024 թվականին ԱՄՆ-ն ապահովել էր Եվրամիության LNG ներմուծման 58 տոկոսը, իսկ Կատարում գազի արդյունահանման խնդիրների ֆոնին այդ կախվածությունը կարող է էլ ավելի խորանալ։

Մերձավոր Արևելքում իրավիճակի սրման և Օրմուզի նեղուցի շուրջ խնդիրների պատճառով Եվրոպայում գազի և նավթի գները կտրուկ աճել են։ Որոշ երկրներ, այդ թվում՝ Իսպանիան, ստիպված են եղել ավելացնել ռուսական LNG-ի գնումները՝ չնայած ռուսական էներգակիրներից հրաժարվելու ռազմավարությանը։ Փորձագետները նախազգուշացնում են, որ եթե Օրմուզի նեղուցի շրջափակումը երկարատև լինի, Եվրոպան ստիպված կլինի ավելի մեծ ծավալներով անցնել ամերիկյան LNG-ի ներմուծմանը։