Ռուս գեներալը Ելցինին մեղադրել է Արևմուտքի «գաղութ» ստեղծելու մեջ

Ռուսաստանի Պետդումայի պատգամավոր, գեներալ-լեյտենանտ Անդրեյ Գուրուլյովը հայտարարել է, որ Ռուսաստանի առաջին նախագահ Բորիս Ելցինը ժամանակին երկիրը վերածել էր Արևմուտքի «գաղութի»։ Նրա խոսքով՝ ներկայիս նախագահ Վլադիմիր Պուտինը փորձում է վերադարձնել երկրի ինքնիշխանությունը, գրում է «Царьград»-ը։

Գուրուլյովի կարծիքով՝ Ռուսաստանի քաղաքական կտրուկ շրջադարձը սկսվել է դեռ 2007 թվականին՝ Մյունխենի անվտանգության համաժողովում Պուտինի ելույթից, որտեղ նա հայտարարել էր, որ Ռուսաստանն ունի սեփական ուղին և պետք է լինի ինքնիշխան պետություն։ Ռուս գեներալը նշել է, որ այդ ժամանակ արևմտյան քաղաքական շրջանակները լուրջ չէին ընդունում այդ հայտարարությունները, սակայն այսօր իրավիճակն ամբողջությամբ փոխվել է։

Նա նաև պնդել է, որ Արևմուտքը չի ցանկանում տեսնել ուժեղ և ինքնիշխան Ռուսաստան, քանի որ նախընտրում է թույլ և բաժանված պետություններ, որոնք հեշտ է վերահսկել։ Գուրուլյովի խոսքով՝ Ուկրաինայի պատերազմը դարձել է երկար տարիների հակասությունների և Մոսկվայի հետ փոխհամաձայնության չգալու հետևանք։