Հարավաֆրիկյան Հանրապետության նախագահը հրաժարվել է հրաժարական տալ «բազմոցի սկանդալից» հետո

Հարավաֆրիկյան Հանրապետության նախագահ Սիրիլ Ռամաֆոսան հայտարարել է, որ չի պատրաստվում հրաժարական տալ՝ իր իմփիչմենթի հարցի նոր քննարկումների ֆոնին, հայտնում է Sky News-ը։

Քաղաքական սկանդալը կրկին կապված է Ռամաֆոսայի Phala Phala մասնավոր ֆերմայում հայտնաբերված խոշոր գումարի հետ։ 2022 թվականին լրատվամիջոցները գրել էին, որ ֆերմայում բազմոցների մեջ թաքցված կարող էր լինել մոտ 4 միլիոն դոլար կանխիկ գումար։ Ինքը՝ նախագահը, պնդել էր, որ խոսքը մոտ 580 հազար դոլարի մասին է, որը ստացվել էր օտարերկրյա գնորդին գոմեշներ վաճառելու արդյունքում։

Անկախ հանձնաժողովը հետագայում ենթադրել էր, որ գումարը կարող էր ստացվել անօրինական ճանապարհով, սակայն երկրի Ազգային ասամբլեան այդ ժամանակ դեմ էր քվեարկել իմփիչմենթի գործընթացի մեկնարկին։ Այժմ խորհրդարանում կրկին ստեղծվում է հանձնաժողով՝ հարցը վերանայելու համար, սակայն Ռամաֆոսան հայտարարում է, որ իր դեմ ներկայացված մեղադրանքները հիմնված են «լուրերի և չապացուցված պնդումների վրա»։