Պետդումայում հայտարարել են, որ Ուկրաինայի հակամարտության ավարտը «անխուսափելի է»

Ռուսաստանի Պետդումայի պատգամավոր Անդրեյ Կարտապոլովը հայտարարել է, որ Ուկրաինայում ընթացող ռազմական գործողությունների ավարտը «անխուսափելի է» և, իր կարծիքով, այն կավարտվի Ռուսաստանի հաղթանակով, գրում է Life.ru-ն։

Կարտապոլովի խոսքով՝ ռազմաճակատում գտնվող զինվորականները կատարում են իրենց առաջադրանքները, իսկ քաղաքացիական բնակչությունը պետք է աշխատի երկրի ներսում՝ արագացնելու համար «հաղթանակի օրը»։ Նա ընդգծել է, որ Ռուսաստանը պետք է ինքնուրույն լուծի իր խնդիրները՝ հետևելով նախագահի դիրքորոշմանը։

Ռուս պատգամավորը նաև դիմել է Ուկրաինայի բնակիչներին՝ հայտարարելով, որ որքան արագ երկրում փոխվի ներկայիս իշխանությունը, այնքան արագ հնարավոր կլինի ավարտել հակամարտությունն ու վերականգնել հարաբերությունները երկու երկրների միջև։ Ավելի վաղ Կրեմլը հայտարարել էր, որ լիարժեք խաղաղ բանակցությունների մեկնարկի համար Ուկրաինան պետք է դուրս բերի զորքերը Դոնբասից։