Google-ը ներկայացրել է Android-ով աշխատող նոր նոութբուք

Google-ը հայտարարել է Googlebook անվանումով նոր նոութբուքերի շարքի ստեղծման մասին, որոնք կաշխատեն Android համակարգի հիման վրա և կունենան արհեստական բանականության լայն հնարավորություններ։

Նոր սարքերը ներկայացվել են The Android Show միջոցառման ընթացքում, որտեղ ցուցադրվել է նաև Android 17 օպերացիոն համակարգը։ Googlebook շարքը Google-ը կարտադրի Acer, ASUS, Dell և այլ ընկերությունների հետ համատեղ։ Նոութբուքերը կաշխատեն նոր օպերացիոն համակարգով, որը միավորում է Android-ն ու ChromeOS-ը։

Ընկերության տվյալներով՝ Googlebook-ը նախատեսված է Chromebook մոդելներին փոխարինելու համար։ Բոլոր սարքերը կունենան Gemini Intelligence արհեստական բանականության գործիքակազմ, ինչպես նաև Magic Pointer խելացի կուրսոր, որը կառաջարկի տարբեր գործողություններ՝ կախված էկրանի վրա ընտրված օբյեկտից։ Նոութբուքերը նաև կկարողանան Android սմարթֆոնների հետ աշխատել առանց լարային միացման։ Google-ը դեռ չի հայտնել նոր սարքերի վաճառքի մեկնարկի ժամկետներն ու գները։