Ումբերտո Ֆաննիի շնորհիվ հայկական երաժշտարվեստը ներկայացվում է միջազգային հեղինակավոր հարթակում

Օմանի Թագավորական օպերային թատրոնի գլխավոր տնօրեն և գեղարվեստական ղեկավար Ումբերտո Ֆաննին արժանացել է ՀՀ կրթության, գիտության, մշակույթի և սպորտի նախարարության մեդալին՝ երաժշտարվեստում ունեցած ավանդի, միջազգային մշակութային համագործակցության ամրապնդման և Հայաստանի պետական սիմֆոնիկ նվագախմբի հիմնադրման 20-ամյակի շրջանակներում։ Պարգևը նրան հանձնել է ՀՀ ԿԳՄՍ նախարար Ժաննա Անդրեասյանը։

Համաշխարհային կատարողական արվեստների ոլորտում բարձր հեղինակություն վայելող մշակութային ղեկավար Ումբերտո Ֆաննին տարիներ շարունակ կարևոր գործընկեր է Հայաստանի պետական սիմֆոնիկ նվագախմբի համար։ Նրա նախաձեռնությամբ և աջակցությամբ Օմանի Թագավորական օպերային թատրոնում կայացած համերգները հայկական երաժշտարվեստը ներկայացրել են միջազգային բարձրակարգ հարթակում՝ խթանելով նաև Հայաստանի և Օմանի միջև մշակութային կապերի զարգացումը։ Ֆաննիի ղեկավարությամբ Royal Opera House Muscat-ը վերածվել է համաշխարհային նշանակության արվեստի կենտրոնի՝ միավորելով լավագույն ստեղծագործական ուժերին և միջազգային մշակութային ծրագրերին։ Նրա մասնագիտական ուղին ընդգրկում է նաև եվրոպական առաջատար մշակութային հաստատություններում ղեկավար աշխատանք՝ ներառյալ Arena di Verona-ն և Teatro Lirico “G. Verdi”-ն, ինչպես նաև երկարամյա ակադեմիական գործունեություն Միլանի Կաթոլիկ համալսարանում։

Միջազգային մշակութային համագործակցության զարգացման գործում ունեցած ներդրման համար Ումբերտո Ֆաննին 2024 թվականին արժանացել է նաև Օմանի շքանշանի՝ վերահաստատելով նրա բացառիկ դերակատարությունը համաշխարհային մշակութային դիվանագիտության ոլորտում։