Կիբեռանվտանգության ոլորտում կիրառելի միջազգային ստանդարտների ցանկ կսահմանվի

Կառավարության՝ մայիսի 14-ի նիստին ԲՏԱ նախարարի առաջին տեղակալ Գևորգ Մանթաշյանը ներկայացրեց Կիբեռանվտանգության ոլորտում կիրառելի միջազգային ստանդարտների ցանկը սահմանելու մասին որոշման նախագիծը, համաձայն որի՝ օրենքից բխող կենսական նշանակության ոլորտներում շահագործող կրիտիկական տեղեկատվական ենթակառուցվածքների վերաբերյալ միջազգային ստանդարտներ են սահանվում. հիմնականում ISO ստանդարտի 27001 ստաննդարտն է:

Սահմանվում են նաև կիբեռանվտանգության ապահովման ծառայություն մատուցողների նկատմամբ պահանջներ, ինչպես նաև տվյալ համակարգերն աուդիտ անցկացնելու դեպքում աուդիտ անցկացնելու ստանդարտներ:

«Թվային գործիքներն ավելի լայն տարածում են ունենում. դրանք կարող են շատ ռիսկեր պարունակել: Կարծում ենք, որ սա շատ պահանջված գործողություն է այս պահին: Սա կբերի նաև բիզնեսի համար որոշակի ծախսեր, բաց կարծում ենք՝ սա մեր հանընդհանուր անվտանգության նկատմամբ ներդրում է լինենլու»,- ասաց նա՝ նշելով, որ սա անակնկալ չէ, քանի որ այն 3 անգամ դրվել է idraft համակարգում և քննարկվել է ոլորտի ընկերությունների ներկայացուցիչների հետ:

Այս ամենը տարածվելու է նաև պետական համակարգի վրա: Անցումային դրույթ է սահմանվելու 24 ամիս ժամկետը: Ստանդարտների սերտիֆիկացումները պետք է ներկայացվեն ՏՏ համակարգերի կարգավորման հանձնաժողովին մինչև 2028 թվականի հունվարի 4-ը: Ըստ նախարարի տեղակալի՝ այս ժամկետը կարևոր ազդակ է նաև մասնավորին, որպեսզի սկսվեն այս ուղղությամբ աշխատանքները:

Փոխվարչապետ Մհեր Գրիգորյանը նկատեց՝ կան բիզնեսներ, որոնք արդեն իսկ կիբեռանվտանգության այս մեխանիզմի ստանդարտով են աշխատում, ապա հետաքրքրվեց՝ ո՞ր ոլորտների համար է գործելու ստանդարտի լինելիությունը:

Նախարարի տեղակալը պատասխանեց՝ այդ ոլորտներն են էներգետիկայի ոլորտը, արտադրության, քիմիական, սննդամթերքի, զենք-զինամթերքի, բժշկական, էկեկտրական, համակարգչային էլեկտրոնիկայի և օպտիկական սարքերի արտադրության, տրանսպորտային ոլորտը, ջրի մատակարարման, կեղտաջրերի հեռացման, կապի, այդ թվում՝ հեռահաղորդակցության, փոստի, ֆինանսական ծառայությունների, առողջապահության, ՏՏ-ի, այդ թվում՝ թվային ենթակառուցվածքների շահագործման, ռադիոակտիվ ընդերքօգտագործման շահագործման ընկերությունների և դրանց կառավարմամբ զբաղվող ընկերությունների ոլորտը, տիեզերական գործունեության, տվյալների շտեմարանների կառավարման, արտակարգ իրավիճակում անվտանգության ապահովման և պետական կառավարման:

Փոխվարչապետը նկատեց՝ անցումային շրջանում ինտենսիվորեն պետք է համագործակցել, բացատրել բիզնեսներին՝ ինչ է արվում, ինչ պետք է անեն նրանք, ինչ շահեր ունեն գործընթացից՝ միաժամանակ ընդգծելով, որ սա շատ կարևոր որոշում է: