Ռուսաստանում կոչ են արել ոչնչացնել Ուկրաինայի անօդաչու սարքերի ոլորտը

Ռուսաստանի Պետդումայի պաշտպանության հանձնաժողովի նախագահի առաջին տեղակալ Ալեքսեյ Ժուրավլյովը հայտարարել է, որ ռուսական քաղաքների վրա անօդաչու սարքերի հարձակումները կշարունակվեն այնքան ժամանակ, քանի դեռ Ուկրաինան հնարավորություն ունի արտերկրից ստանալ դրոնների բաղադրիչներ և արտադրել դրանք իր տարածքում։ Այդ մասին նա ասել է «Լենտա.ռու»-ին տված մեկնաբանությունում։

Ժուրավլյովի խոսքով՝ Ուկրաինայի պաշտպանական ոլորտի աշխատակիցները շարունակում են հավաքել հարվածային անօդաչու սարքեր՝ օգտագործելով արտասահմանից մատակարարվող պահեստամասերը։ Նա նաև նշել է, որ Ուկրաինայի նախագահ Վլադիմիր Զելենսկուն բարձր տեխնոլոգիական սպառազինություն անհրաժեշտ չէ, քանի որ նույնիսկ էժան դրոնները կարող են օգտագործվել ռուսական քաղաքների վրա զանգվածային հարձակումների համար։

Ռուս պատգամավորն ընդգծել է, որ անհրաժեշտ է կենտրոնանալ Ուկրաինայի անօդաչու սարքերի ամբողջ ոլորտի ոչնչացման վրա՝ ներառյալ լոգիստիկան և օպերատորների պատրաստումը։ Նրա հայտարարությունը հնչել է Ռյազանի վրա իրականացված հարձակումից հետո, որի հետևանքով, վերջին տվյալներով, զոհերի թիվը հասել է չորսի։