Թուրքիան շարունակում է հավատարիմ մնալ Եվրամիությանը միանալու իր նպատակին. Էրդողան

Թուրքիան շարունակում է հավատարիմ մնալ Եվրամիությանը միանալու իր նպատակին՝ չնայած Անկարայի նկատմամբ խտրական մոտեցումներին և վիճահարույց քաղաքականությանը, հայտարարել է նախագահ Ռեջեփ Թայիփ Էրդողանը։

«Չնայած այն հանգամանքին, որ Թուրքիայի դեմ ժամանակ առ ժամանակ կիրառվել են միջոցներ՝ որոշները հակասական, որոշները՝ բացահայտ խտրական, մենք հավատարիմ ենք մնում մեր անդամակցության առաջարկին», – Ղազախստանից վերադառնալուց հետո ինքնաթիռում լրագրողներին ասել է Էրդողանը։

Թուրք առաջնորդի խոսքով՝ Անկարան ԵՄ անդամակցությունը դիտարկում է ոչ թե որպես մրցակցության գործիք, այլ որպես հնարավորություն՝ ամրապնդելու ինչպես Թուրքիան, այնպես էլ Եվրամիությունը։

Էրդողանը շեշտել է, որ Թուրքիան բեռ չէ միջազգային կառույցների համար, այլ, ընդհակառակը, նպաստում է դրանց զարգացմանը և մեծացնում դրանց կարևորությունը։

Թուրքիայի նախագահը նաև հայտարարել է, որ ԵՄ-ն պարբերաբար «անհաջող և մակերեսային» հայտարարություններ է անում Անկարայի մասին: Նա կարծում է, որ նման դիրքորոշումը վնասակար է հենց ԵՄ-ի համար՝ աշխարհում գլոբալ փոփոխությունների պայմաններում:

Էրդողանը Թուրքիան անվանել է «հսկայական հնարավորություն» ԵՄ-ի համար և ասել, որ Եվրոպան գտնվում է խաչմերուկում և պետք է պատմական որոշում կայացնի Անկարայի հետ իր ապագա հարաբերությունների վերաբերյալ։

Թուրքիան պաշտոնապես դիմել է ԵՄ անդամակցության համար 1987 թվականին, իսկ անդամակցության բանակցությունները սկսվել են 2005 թվականին։